Жаңа жыл түні елімізде 181 нәресте дүниеге келді. Олардың арасында 105 ұл, 76 қыз және бір егіз тіркелді. Егіздер Маңғыстау облысында өмірге келгені туралы ҚР Денсаулық сақтау министрлігі хабарлады.
Түркістан облысы мерекелік түнде ең көп нәресте тіркелген аймақ ретінде көш бастады – мұнда 34 сәби дүниеге келген. Одан кейін Алматы қаласы мен Алматы облысында әрқайсысында 17 нәрестеден, ал Шымкент қаласында 16 бала өмірге келді.
Дәрігерлердің айтуынша, жаңа жылда дүниеге келген балалар мен олардың аналарының денсаулықтары жақсы. Айта кетерлігі, Түркістан облысы республика бойынша бала туу көрсеткішінен алдыңғы қатарда тұр.
