Сауран ауданының орталығында «Жұртқа жақын полиция» қағидатын іске асыру және құқық бұзушылықтардың алдын алу мақсатында жаңа полиция бекеті ашылды. Аудан әкімі Мақсат Таңғатаров жаңа ғимараттың қызметімен танысып, оның жұмыс тиімділігін арттыруға бағытталған бірқатар ұсыныстарын жеткізді.
Жаңа бекет қоғамдық тәртіпті сақтау мен тұрғындардың қауіпсіздігін қамтамасыз ету үшін арнайы салынған. Мұнда полиция қызметкерлері бекітілген кесте бойынша кезекшілік етеді, ал сағат 18:00-ден 21:00-ге дейін учаскелік инспектор азаматтарды қабылдайды. Бұл жерде тұрғындардың өтініштері мен арыздары қаралып, құқықтық тәртіпті қамтамасыз етуге бағытталған шаралар жүзеге асырылатын болады.
Бекет барлық қажетті жабдықтармен қамтамасыз етілген, бұл полиция қызметкерлеріне халықпен тығыз байланыста жұмыс істеуге және құқық бұзушылықтардың алдын алу шараларын күшейтуге мүмкіндік береді.
Жақын уақытта дәл осындай полиция бекеттері Жібек жолы, Иассы, Қарашық және Жаңа Иқан ауылдық округтерінде де ашылады деп жоспарлануда.
