ҚР Президенті Қасым-Жомарт Тоқаевтың тапсырмасына сәйкес, елді мекендердің инфрақұрылымын дамыту және тұрғындардың өмір сапасын арттыру бағытындағы жұмыстар жалғасуда. Осы аясында Түркістан облысы, Сауран ауданы, Ораңғай ауылында № 41 өрт сөндіру депосының жаңа ғимараты пайдалануға берілді.
Өрт сөндіру бекетінің ашылу рәсіміне ҚР Төтенше жағдайлар министрі Шыңғыс Әрінов, Түркістан облысының әкімі Дархан Сатыбалды, азаматтық қорғау органдарының ардагерлері және басқа да құрметті қонақтар қатысты. Өңір басшысы тұрғындарды құттықтай отырып:
– Түркістан облысының төтенше жағдайлар қызметін материалдық-техникалық тұрғыдан қамтамасыз ету тұрақты бақылауда. Жаңа бекет «Turan» арнайы экономикалық аймағында бой көтерді. Оның маңызы ерекше, себебі мұнда өндіріс орындары ашылып, экономикалық аймақтың дамуы күтілуде. Бұл бекет жақын маңдағы елді мекендердің өрт қауіпсіздігін қамтамасыз етеді. Сіздердің бұл маңызды міндетті абыроймен атқаратыныңызға сенімдіміз! – деді Дархан Сатыбалды.
Жергілікті бюджет есебінен салынған өрт сөндіру депосы төрт өрт сөндіру көлігімен жабдықталған. Екі қабатты ғимаратта өрт сөндірушілердің кәсіби және тұрмыстық қажеттіліктеріне арналған оқу сыныбы, демалыс бөлмелері, жатын орындар, асхана, спорт және конференция залдары, сондай-ақ оқу-жаттығу мұнарасы қарастырылған.
Заманауи техникалармен жабдықталған депода 50 өрт сөндіруші қызмет етеді. Бұл жаңа нысан өрт сөндірушілердің жұмыс тиімділігін арттырып, өңірдегі өрт қауіпсіздігін күшейтуге мүмкіндік береді.
Салтанатты шара барысында депо аумағында ағаш отырғызу рәсімі ұйымдастырылды.
