Түркістан облысында 128 қатты тұрмыстық қалдықтар полигонының 65%-ы санитарлық талаптарға сәйкес келмейді. Осы мәселені шешу үшін 2024-2026 жылдарға арналған іс-шара жоспары бекітіліп, 16 полигонның жобалық-сметалық құжаттары дайындалып, мемлекеттік сараптама қорытындысы алынған. Биыл Созақ ауданында 3 ҚТҚ полигон орнында құрылыс жұмыстары жүргізілді. Сонымен қатар қалдықтарды кәдеге жарату үлесін 26%-ға жеткізу жоспарланған, және бұл мақсат толық орындалды.
Облыс аумағында экологиялық тәрбие мен білімді дамыту аясында жасөспірімдер арасында «Қалдықтарды бөлек жинайық», «Табиғатты аялайық», «Қоршаған ортаға ұқыпты қарайық» тақырыптарында түрлі экологиялық акциялар өткізілді.
Облыстың су қорғау аймақтарында экожүйені сақтау мақсатында 35 метр көлеміндегі су қорғау белдеу белгілері қайта бекітіліп, 100 және 500 метрлік жаңа белдеулер орнатылды. Жалпы, 150 өзенге, 31 су қоймаға, 2 табиғи көлге су қорғау аймақтары мен белдеулері қойылды.
Мемлекеттік экологиялық сараптама барысында 443 қоғамдық тыңдаулар ұйымдастырылды, және тыңдаулар нәтижесінде экологиялық зияны жоқ жобалар жергілікті тұрғындардың келісімімен қолдау тапты.
