Кентау қалалық полиция бөліміне көлігінің бөлшектері ұрланғандығы жөнінде жергілікті тұрғын арызданған. Жәбірленушінің айтуынша, белгісіз біреулер оның «ВАЗ» маркалы көлігінен магнитофон мен аккумуляторын ұрлап кеткен. Осыған ұқсас шағымдармен полицияға тағы бірнеше азамат жүгінген.
Оқиға орнына шыққан жедел-тергеу тобы автоұрыларды анықтап, ұстау мақсатында қажетті іс-шараларды жүзеге асырды. Жедел-іздестіру жұмыстарының нәтижесінде полицейлер екі күдіктіні ұстаған. Олар Сауран ауданының тұрғындары екен. Жас жігіттер қылмыстарын толығымен мойындады. Олардың бөтеннің мүлкін ұрлаудың 4 дерегіне қатысы бары анықталды. Заттай дәлелдемелер тәркіленді.
Күдіктілер негізінен автокөлік бөлшектерін «ВАЗ» көліктерінен жымқырып отырған. Адамдардың жоқтығын пайдаланып, көліктердің антеннасы, аккумуляторы, динамиктері және басқа да құнды заттарын ұрлаған. Жәбірленушілерге келтірілген шығын көлемі шамамен 170 мың теңгені құрайды.
Аталған деректер ҚР ҚК-нің 188-бабы (Ұрлық) бойынша сотқа дейінгі тергеп-тексеру амалдары жүргізілуде.
