Бәйдібек ауданында алдағы төрт жылда жалпы құны 25 миллиард теңге болатын 27 ірі инвестициялық жоба жүзеге асырылмақ. 2025 жылы «Корпорация ERNUR» ЖШС 860 мың басқа арналған құс фабрикасын іске қосады, оның құны 7,6 миллиард теңге болмақ. Бұл фабрика жылына 200 миллион жұмыртқа өндіруді жоспарлап, 45 адамды тұрақты жұмыспен қамтуы күтілуде. Сонымен қатар, Боралдай ауылдық округінде «Шаян» индустриалды аймағы құрылуда, онда жыл соңына дейін травертин тасын өңдейтін «Рамирта» ЖШС орналасып, 44 адам жұмысқа қабылданады. 2025 жылы травертин тасын өндіретін тағы бір кәсіпорынның құрылысын бастау жоспарланып отыр.
Бәйдібек ауданының әкімі Ерлан Нұрмаханов БАҚ өкілдерімен өткен брифингте аудандағы экономикалық жағдайды баяндады. 2024 жылдың 10 айында ауданның жалпы өңірлік өнімі 57,6 миллиард теңгені құраған, бұл өткен жылдың тиісті кезеңінен 9,4%-ға артық. Осы жылдың басынан бері ауданға 24 миллиард теңге инвестиция тартылған, ал жыл қорытындысында көрсеткіш 29,4 миллиард теңгеге жетеді деп күтілуде. Ауыл шаруашылығында да жақсы нәтижелер бар, жыл басынан бері өнім көлемі 31,1 миллиард теңгеге жеткен.
Ауданда шағын және орта кәсіпкерлік нысандарының саны 5 520 бірлікке жеткен. Ел Президентінің тапсырмасын орындау мақсатында биыл 401 жаңа жұмыс орны ашылды. Ауданда экономикалық белсенді халықтың саны 18 мыңды құрап, оның 17 мыңнан астамы тұрақты жұмыс орындарымен қамтылған.
Инфрақұрылым саласында да бірқатар оң өзгерістер байқалуда. Аудан тұрғындарының 62,1%-ы табиғи газбен қамтамасыз етілген, жыл соңына дейін бұл көрсеткіш 86%-ға дейін артады деп күтілуде. Сондай-ақ, ауданның 97,8%-ы таза ауыз сумен қамтылған. 2024 жылы «Оңтүстік Жарық Транзит» серіктестігінің инвестициялық бағдарламасы аясында 5 елді мекенде 13 шақырым әуе желісі мен 512 бағана орнатылды.
