Тәуелсіздік күні қарсаңында Тарбағатай ауданына қарасты Тәуке ауылында 80 орындық жаңа мектептің салтанатты ашылуы өтті. Заманауи талаптарға сай жабдықталған бұл білім ордасы оқушыларға сапалы білім алуға барлық жағдайды қамтамасыз етеді.
Сонымен қатар ғимаратта шағын балабақша да қарастырылған, бұл ауылдағы мектепке дейінгі білім беруді дамытуға септігін тигізеді.
Ашылу рәсімінде аудан әкімі Дархан Жөргекбаев құттықтау сөз сөйлеп, мектептің құрылысына атсалысқан ауыл тұрғындарына ризашылығын білдіріп, арнайы «Алғыс хаттар» табыстады.
Салтанатты шарада облыстық білім басқармасының басшысы Инесса Чернышева сөз сөйлеп, облыс әкімі Ермек Көшербаевтың қолдауымен химия-биология пәндеріне арналған зертханаларға қажетті құрал-жабдықтар алу үшін қаражат бөлінетінін мәлімдеді.
Тұрғындар көптен күткен жаңа мектеп оқу процесін бастауға толықтай дайын. Бұл білім ордасы ауыл балаларына сапалы білім беріп, олардың жарқын болашағына негіз болары сөзсіз.
