Елімізде жол көлік оқиғаларының орын алуына көбінде қараусыз жүрген үй жануарларының жолға шығып кетуі себеп болып жатады. Осындай жағдайлардың алдын алу мақсатында Түркістан облысы Полиция департаментінің қызметкерлері түрлі шараларды іске асыруда. Күнделікті тәртіп сақшыларымен профилактикалық, рейдтік жұмыстар жүргізілуде. Өңіріміздің полицейлері оқыс жағдайларды болдырмау үшін аудандық әкімдіктерге ұсыныс жолдаған. Соның нәтижесінде облыс көлеміндегі республикалық, облыстық маңызы жолдардың бойында үй жануарларының 35 макеті қойылған. Сонымен қатар, жылқылардың мойнына жарық шағылыстыратын таспалар ілінуде. Атап айтсақ, Бәйдібек, Келес, Мақтаарал, Сауран, Созақ аудандарына 23 дана жылқы, 1 дана түйе, 11 дана сиыр макеті орналастырылды. Мұндай белгілердің орнатылуы жол көлік оқиғаларының азаюына септігін тигізеді.
