Ахмет Байтұрсынұлының «Ұлттың сақталуына да, жоғалуына да себеп болатын нәрсенің қуаттысы – тіл» деген терең мағыналы сөзін басты ұстаным еткен Жетісай аудандық мәдениет, тілдерді дамыту, дене шынықтыру және спорт бөліміне қарасты «Тілдерді оқыту және дамыту орталығы» халқымыздың баға жетпес рухани мұрасын насихаттау және оның қадір-қасиетін арттыру жолында жүйелі жұмыстар атқарып келеді.
Мемлекеттік тілдің мәртебесін көтеру мақсатында орталықтың бастамасымен аудан аумағындағы көрнекі ақпарат құралдары мен жарнамалардың, нысан атауларының сауатты жазылуына мониторинг жүргізілді.
Қазақстан Республикасында тіл саясатын дамыту жөніндегі 2023-2029 жылдарға арналған тұжырымдама аясында «Тіл туралы» және «Жарнама туралы» заңдардың талаптарын орындау мақсатында ұйымдастырылған бұл шара барысында шағын және орта бизнес өкілдеріне көрнекі ақпараттар мен жарнамаларды әзірлеу кезінде мәтіндердің сауатты жазылуы, дұрыс орналастырылуы, сондай-ақ анықталған қателерді түзету жөнінде кеңестер берілді.
Мамандардың айтуынша, жарнама мәтіндерінде орфографиялық қателіктер жиі кездеседі және олардың көпшілігі орыс тілінде жазылған. Жыл басынан бері анықталған 30 кемшіліктің 22-сі түзетіліп, қалғандары бойынша жұмыс жалғасуда. Ауданда жалпы саны 1069 маңдайша, жарнама тақтайшалары, лозунгтер мен билбордтар бар. Бұл бағыттағы жұмыстар жыл соңына дейін жалғаспақ.
