Пирография – сурет салудың ерекше техникасы, ағашқа отпен сурет салу деп те аталады. Бұл – аса дәлдік пен шыдамдылықты талап ететін күрделі қолөнер. Екінші топ мүгедегі Олег Некрасов осы шеберлікті меңгерген. Ол өз шеберханасын Шығыс Қазақстан облысы, Солнечный ауылындағы қарттар мен мүгедектер пансионатында ашқан.
– Біздің пансионатта арт-терапия кеңінен қолданылады. Оның 14 бағыты бар, соның ішінде мозаика мен изотерапия. Ал пирография Олегке ең жақыны. Біз суретшіге қажетті материалдарды толығымен қамтамасыз етеміз, оның жұмыстары күн сайын көбейіп келеді. Қазіргі уақытта ол 500-ден астам туынды жасады. Оның портреттері мен пейзаждары Қазақстанның түкпір-түкпіріне таралуда, – дейді пансионат директоры Жәнібек Шаяхметов.
Жақында Олег Некрасовтың туындыларына жаңа рең берілді. Оның тұрақты жанкүйерлерінің кеңесі бойынша, суретші қара-ақ картиналарына түс қоса бастады. Енді туындыларының көркемдігі артып, жан бітті деп бағалайды фанаттары.
– Негізінен, А3 және А4 форматтарында жұмыс істеймін. Егер картинаның сюжетінен шабыт алсам, бір күнде бітіріп тастаймын. Кейде жұмыс бір аптаға созылады, бірақ ондай сирек болады. Ағашқа сурет салмас бұрын, бейнені қағазға шығарып, соған қарап суреттеймін. Ағашты алдын ала өңдеп, тегістеймін. Алдымен суретті қарындашпен түсіремін, содан кейін барып күйдіргішпен жұмыс істеймін, – дейді Олег Некрасов.
Суретшінің Instagram парақшасы бар, онда ол туындыларын жариялап отырады. Уникалды картинаны сатып алғысы келген кез келген адам оған жазып, қажетті бейнені тапсырыс бере алады.
Шебер өз өнерін өзгелерге үйреткісі келетінін мойындайды. Ол пирографиядан сабақ өткізуді қуана қолға алар еді, бірақ үйренгісі келетіндер әзірге табылмай отыр.
Инсульт алғаннан кейін суретшінің оң қолы дұрыс істемей қалған. Алайда бұл қиындық картиналар жасауға кедергі болмады. Олег Некрасов өз өнерін дамыту мен жетілдіруді жалғастырып келеді.
