Тәуелсіздік күні қарсаңында Тарбағатай ауданында «Бір қабатты Шығыс» бағдарламасы аясында салынған 62 жаңа пәтердің иелері өз қоныстарына ие болды. Бұл бастама аудан тұрғындарын баспанамен қамтуға бағытталған мемлекеттік бағдарламаның маңызды бөлігі болып табылады.
– Жүйелі жүргізіліп жатқан мемлекеттік саясаттың арқасында біз аз қамтылған және көпбалалы отбасыларды баспанамен толық қамтамасыз етіп отырмыз. Келесі кезеңде тұрғын үй кезегінде тұрған басқа санаттағы азаматтарға да үй салу жұмыстарын жалғастырамыз, – деп атап өтті Тарбағатай ауданының әкімі Дархан Жөргекбаев салтанатты жиында.
Аудан аумағындағы құрылыс жұмыстарының нәтижесінде Ақжар ауылында екі жаңа ықшам аудан бой көтерді. Биыл 62 баспана салынса, өткен жылы 27, ал 2022 жылы 14 баспана пайдалануға берілген. Соңғы үш жылда осылайша 103 отбасы жаңа үйге қол жеткізді.
Бұған қоса, биыл Жаңаауыл, Қарасу, Байтоғас және Маңырақ ауылдарында қоспәтерлі тұрғын үйлер тұрғызылды. Бұл шаралар аудан бойынша тұрғын үй мәселесін шешуге бағытталған кешенді жұмыстардың ажырамас бөлігі саналады.
